suno
tum ne mujhe takmīl kā ehsās baḳhshā hai
maiñ aksar sochtī thī ye akelā ghar kabhī ābād bhī hogā
maiñ us an-dekhe mehmāñ kī pazīrā.ī meñ kyā kyā ḳhvāb bhejūñgī
maiñ ye bhī bhuul jā.ūñgī
ki us ik buuñd bhar rishte ke pīchhe umr bhar kī sañgsārī hī muqaddar hai
mirī jaañ maiñ ye sab kuchh bhuul jaanā chāhtī thī
maiñ terī nannhī nannhī uñgliyoñ kī koñpaloñ kā lams pā kar raqs kar uThtī
magar yuuñ hai ki mere chaar sū jo hashr barpā hai
bas ik ḳhāmosh mātam ek be-āvāz naala hai
mirī muskān Dhal jaatī hai
tanhā dard kī maarī thakī haarī huī aurat kī aahoñ meñ
musalsal ḳhāna-jañgī qahat-sālī bhuuk ġhurbat aur vabā.eñ
jis ke darvāze pe dastak de rahī haiñ
thakī haarī huī aurat jo malbe par khaḌī fariyād karte
ye kin ābādiyoñ ko yaad kartī hai
maiñ āñkheñ mūñdnā chāhūñ to ye manzar rulātā hai
mirī jaañ us ghaḌī tū jis bhī pahlū kasmasātā hai