ek an-jānā sā Dar
jab vo paidā huī thī
ek añdherī koTharī kā ḳhauf
rag rag meñ basā thā
jab zarā sā vaqt guzrā
aql ke tāroñ kī jumbish se badan jaagā
phir ḳharīdāroñ kī duniyā meñ zarā sun-gun huī
dil dhaḌakne kī sadā mādūm ho kar rah ga.ī
phir zarā sā hosh aayā
daur-e-nau-umrī gayā to aañkh se parda haTā
ab vo is raste meñ hai sab jis ko rāh-e-marg kahte haiñ
munjamid āñkhoñ meñ ab manzar Thaharte hī nahīñ
us kī andhī koTharī par ek katba nasb hai

''is jagah dildār-begam dafn hai
vo afīfa pārsā sābir-o-shākir so rahī hai