kahīñ paḌe na mohabbat kī maar holī meñ
adā se prem karo dil se pyaar holī meñ
milo gale se gale baar baar holī meñ

lagā ke aag baḌhī aage raat kī jogan
na.e libās meñ aa.ī hai sub.h kī mālan
milo gale se gale baar baar holī meñ

havā har ek ko chal phir ke gudgudātī hai
nahīñ jo hañste unheñ chheḌ kar hañsātī hai
milo gale se gale baar baar holī meñ

ye kis ne rañg bharā har kalī kī pyālī meñ
gulāl rakh diyā kis ne guloñ kī thālī meñ
milo gale se gale baar baar holī meñ

tumhīñ se phuul chaman ke tumhīñ se phulvārī
sajā.e jaao diloñ ke gulāb kī kyārī
milo gale se gale baar baar holī meñ

mile ho baara mahīnoñ kī dekh-bhāl ke ba.ad
ye din sitāre dikhāte haiñ kitnī chaal ke ba.ad
milo gale se gale baar baar holī meñ

burā.ī aaj na aise rahe na vaise rahe
safā.ī dil meñ rahe aaj chāhe jaise rahe
milo gale se gale baar baar holī meñ

hayā meñ Dūbne vaale bhī aaj ubharte haiñ
hasīn shoḳhiyāñ karte hue guzarte haiñ
milo gale se gale baar baar holī meñ