phir aa gayā hai mulk meñ qurbāniyoñ kā maal
kī iḳhtiyār qīmatoñ ne rākiToñ kī chaal
bakre ke pīchhe pīchhe haiñ majnūñ kā bhar ke svāñg
gar ho sake ḳharīdiy.e bakre kī ek Taañg
dehāt se jo shahar meñ bakroñ ko laa.e haiñ
ma.alūm ho rahā hai vo jannat se aa.e haiñ
qurbānī ho bhī jaa.e magar khiñch rahī hai khaal
ai gosht khāne vaalo zarā ḳhud karo ḳhayāl
chaurāhoñ par khaḌe hue bakroñ ke haiñ jo ġhol
tū un ke muñh ko khol ke dāñtoñ ko mat TaTol
bakre tamām raah meñ huñkārte chale
bañgloñ ke bel-būToñ pe muñh mārte chale
bakrā jo siiñg vaalā bhī hai aur fasādī hai
us ne siyāsī-jalsoñ meñ gaḌbaḌ machā dī hai
bakre jo phir rahe haiñ saḌak par idhar udhar
jalsoñ meñ aur julūsoñ meñ karte haiñ shab basar
qurbāniyoñ kā daur hai bakroñ kī ḳhair ho
hai aur baat hālat-e-insān ġhair ho
bakroñ kī itnī garmī-e-bāzār dekh kar
aur qīmatoñ kī tezī-e-raftār dekh kar