chashm-e-bad-dūr karachi meñ traffic kā nizām
ūñT-gāḌī kī gadhā-gāḌī kī Tik-Tik kā nizām
dekho vo jaatī hai rishvat se ḳharīdī huī car
sehn-e-gulshan meñ ho jaise guzarāñ mauj-e-bahār
na ḳhudā kā hai ise Dar na hai insān kā Dar
na ise rakhshā chalāte hue haivān kā Dar
ūñT-gāḌī jo saḌak par nazar aa jaatī hai
''cadillac'' car ise dekh ke sharmātī hai
bus chalī jā rahī hai umr-e-gurezāñ kī tarah
Thas ke baiThe haiñ musāfir saf-e-mizhgāñ kī tarah
rickshaw jaatī hai dikhātī huī josh aur ḳharosh
aur vo naġhma jise sun ke ho jheñgur ḳhāmosh
ek hafta bhī traffic kā manā.egī police
jāda-paimā.ī ke ādāb sikhā.egī police
kitnā achchhā hai karachi meñ traffic kā nizām
na to public na police vāloñ ke muñh meñ hai lagām