ajnabī jaan ke ik shaḳhs ne yuuñ mujh se kahā

vo makāñ niim kā vo peḌ khaḌā hai jis meñ

vo makāñ jis ke dar-o-bām ka.ī sāloñ se

muntazir haiñ, koī mahtāb-sifat shahzāda

log kahte haiñ yahāñ raat ke sannāTe meñ

kuchh ajab tarah kī āvāzeñ huā kartī haiñ

ek āvāz ki ''tum ne to mujhe chāhā thā''

ek āvāz ki ''tum ahd-e-vafā bhuul ga.e''

log kahte haiñ ka.ī saal hue is ghar meñ

ḳhūb-sūrat sā koī shaḳhs rahā kartā thā

log kahte haiñ ki ik raat ke sannāTe meñ

ik parī aa.ī idhar taḳht-e-sulaimānī par

ajnabī jaan ke us shaḳhs ne yuuñ mujh se kahā

maiñ magar soch rahā thā ki koī pahchān na le