kitnī rañgīñ hai fazā kitnī hasīñ hai duniyā
kitnā sarshār hai zauq-e-chaman-ārā.ī aaj
rū-numā.ī kī ye saa.at ye tahī-dastī-e-shauq
na churā saktā huuñ āñkheñ na milā saktā huuñ
kab se taḳh.īl meñ larzāñ thā ye nāzuk paikar
kab se ḳhvāboñ meñ machaltī thī javānī terī
marhale jhel ke nikhrā hai mazāq-e-taḳhlīq
sa.ī-e-paiham ne diye haiñ ye ḳhad-o-ḳhāl tujhe
tere qāmat meñ hai insāñ kī bulandī kā vaqār
duḳhatar-e-shahr hai, tahzīb kā shahkār hai tū
ye tirā paikar-e-sīmīñ, ye gulābī saarī
dast-e-mehnat ne shafaq ban ke uḌhā dī tujh ko
āgahī ne tirī bātoñ meñ khilāīñ kaliyāñ
ilm ne shakkarīñ lahje meñ nichoḌe añgūr
ye latāfat, ye nazākat, ye hayā, ye shoḳhī
sau diye julte haiñ umDī huī zulmat ke ḳhilāf
hausle jaag uThe soz-e-yaqīñ jaag uThā
nigah-e-nāz ke be-nām ishāroñ ko salām
aa qarīb aa ki ye juuḌā maiñ pareshāñ kar duuñ
tishna-kāmī ko ghaTāoñ kā payām aa jaa.e