hamārī pyārī zabān urdu
hamārī naġhmoñ kī jaan urdu
isī zabāñ meñ hamāre bachpan ne maaoñ se loriyāñ sunī haiñ
javān ho kar isī zabāñ meñ kahāniyāñ ishq ne kahī haiñ
isī zabāñ se vatan ke hoñToñ ne na.ara-e-inqilāb paayā
isī se añgrez hukmarānoñ ne ḳhud-sarī kā javāb paayā
ye apne naġhmāt-e-pur-asar se diloñ ko bedār kar chukī hai
ye apne na.aroñ kī fauj se dushmanoñ pe yalġhār kar chukī hai
koī batāo vo kaun sā moḌ hai jahāñ ham jhijak ga.e haiñ
vo kaun sī razm-gāh hai jis meñ ahl-e-urdu dubak ga.e haiñ
ye vo zabāñ hai ki jis ne zindāñ kī tīrgī meñ diye jalā.e
ye vo zabāñ hai ki jis ke sho.aloñ se jal ga.e phāñsiyoñ ke saa.e
kahā hai kis ne ham apne piyāre vatan meñ bhī be-vatan raheñge
zabān chhin jā.egī hamāre dahan se ham be-suḳhan raheñge
ye kaisī bād-e-bahār hai jis meñ shāḳh-e-urdu na phal sakegī
vo kaisā rū-e-nigār hogā na zulf jis par machal sakegī
hameñ ye haq hai ham apnī ḳhāk-e-vatan meñ apnā chaman sajā.eñ
hamārī hai shāḳh-e-gul to phir kyuuñ na us pe ham āshiyāñ banā.eñ
kahāñ ho matvālo aao bazm-e-vatan meñ hai imtihāñ hamārā
zabān kī zindagī se vābasta aaj suud o ziyāñ hamārā
chale haiñ gañg-o-jaman kī vaadī meñ ham havā-e-bahār ban kar
himāliya se utar rahe haiñ tarāna-e-ābshār ban kar
hamārī pyārī zabān urdu
hamārī naġhmoñ kī jaan urdu