rakh to lī baat tirī ab na kabhī bolūñgā
ab tasavvur meñ kabhī tujh ko na maiñ gholūñgā
ab na phir paañv kabhī terī taraf jā.eñge
ab na hāthoñ ke irāde tujhe chhū pā.eñge
rakh to lī baat tirī ab na kabhī bolūñgā
ab na hoñToñ pe bilā-vaj.h hañsī chhā.egī
ab na chehre pe koī shakl utar pā.egī
ab na zulfoñ ko tire hāthoñ kī chāhat hogī
ab na ḳhvāboñ ko tire aane kī hasrat hogī
rakh to lī baat tirī ab na kabhī bolūñgā
ab na paimāne meñ tasvīr tirī utregī
ab na dil se koī nāzuk sī ḳhushī guzregī
ab na darvāze kī dastak pe nazar jā.egī
ab na naġhmoñ se mire terī mahak jā.egī
rakh to lī baat tirī ab na kabhī bolūñgā