tirā nanhā sā qāsid jo tire ḳhat le kar aatā thā
na thā ma.alūm use kis tarah ke paiġhām laatā thā
magar mujh ko ḳhayāl aatā thā akasr us zamāne meñ
ki us kī hairat-e-tiflī hai kyuuñ gum us fasāne meñ
vo pahle se ziyāda bhaa.ī ko kyuuñ pyaar kartī haiñ
lifāfa de ke lutf-e-ḳhās kā iz.hār kartī haiñ
tire qāsid ke ye afkār dil ko gudgudāte the
aur apne bholpan se mere jazboñ ko hañsāte the
magar aaj is tarah dekhā hai vo naqsh-e-hasīñ maiñ ne
ki rakh dī ḳhāk-e-hairat par mohabbat kī jabīñ maiñ ne
junūn-e-ibtidā-e-ishq ne karvaT sī lī dil meñ
pas-az muddat ye le ke aa ga.ī phir apne muhmal meñ
sharārat kā ye nazzāra mirī hairat kā sāmāñ thā
ki is parda ke andar terā rāz-e-ishq uryāñ thā