puurā chāñd nikaltā hai to bheḌiyā aksar rotā hai
raat ko kuttā bhauñ bhauñ kartā din ko ullū sotā hai
sher kī ḳhāla billī us ko kyā kyā sabaq paḌhātī hai
khambā nochne lagtī hai bechārī jab ḳhisyātī hai
bhaiñs ke kaan se kaalā kavvā juueñ chugtā jaatā hai
bolī bhaiñs ki ''ai kavve kyuuñ mere kaan tū khātā hai''
uuñT kī kal sīdhī karne ko aa.e the kutte raajā
bolā uuñT ki ''pahle tū apnī dum sīdhī kar jā jaa''
jugnū kī dum se chamgādaḌ lene thoḌī aag gayā
gīdaḌ kī bhabhkī se Dar kar bāġhaḌ billā bhaag gayā
chamgādaḌ kī biivī darvāze se ulTī laTak ga.ī
puurā hāthī niklā lekin dum hāthī kī aTak ga.ī
bandar baañT rahā thā phaliyāñ bolā gidh ho ke barham
''ye achchhī taqsīm hai terī ḳhud le ziyāda ham ko kam''
hāthī ke dāñtoñ ko chūhe ne dekhā to ye bolā
ye to daañt dikhāne ke haiñ khāne vaale daañt dikhā
buDDhā totā paḌhne kī dhun meñ ik din schōl gayā
kavvā hañs kī chaal chalā to apnī chaal hī bhuul gayā
saañp ke badle bhaiñs ke aage chuhiyā biin bajā.egī
ab ke iid pe būḌhī ghoḌī laal lagām lagā.egī
mor kise jañgal meñ jā kar apnā naach dikhātā hai
gīdaḌ kī shāmat aa.e to shahr kī jānib jaatā hai
dumba zarrāfe kī gardan nāpne ko tayyār huā
murġhābī ke anDe khā kar saañp bahut bīmār huā
ban-mānus kī naak pe makkhī baiThī lekin phisal ga.ī
bhālū ko aatā dekhā to shahd kī makkhī sambhal ga.ī
aadhā tītar khāyā lekin bhūkā rah gayā babbar sher
shernī us ke vāste le kar aa.ī aadhā aur baTer
ullū ko har shāḳh pe baiThā dekh ke TaTTū ḳhvār huā
meñDak kī Tar-Tar se dariyā.ī ghoḌā bezār huā
allāh-jī kī gaa.e paḌosan ke ghar khāne phalī ga.ī
puure nau sau chūhe khā kar billī haj ko chalī ga.ī