ek hī pal ke liye baiTh ke phir uTh baiThī
aañkh ne sirf ye dekhā ki nashista but hai
pech khāte hue ye lahr uThī dil meñ mire
kāsh! ye jhāḌiyāñ ik silsila-e-koh baneñ
yaad aatā hai mujhe kaan hue the bedār
ḳhushk pattoñ se jab aa.ī thī taḌapne kī sadā
lekin is dāman-e-ālūda kī har lahar miTī
jal-parī dekhte hī dekhte rū-posh huī
dāman-e-koh meñ istāda nahīñ huuñ is vaqt
jhāḌiyāñ silsila-e-koh nahīñ parda haiñ
haañ tasavvur ko maiñ ab apne banā kar dūlhā
isī parde ke nihāñ-ḳhāne meñ le jā.ūñgā
aur maiñ kirmak-e-be-nām, ghaTā kī sūrat
isī ummīd meñ taktā rahā taktā hī rahā