kyuuñ jān-e-hazīñ ḳhatra-e-mauhūm se nikle
kyuuñ nāla-e-hasrat dil-e-maġhmūm se nikle
urdu kā ġham-e-marg subuk bhī hai garāñ bhī
hai shāmil-e-arbāb-e-azā shāh-e-jahāñ bhī
ai tāj-mahal naqsh-ba-dīvār ho ġham se
ai qil.a-e-shāhī ye alam pūchh na ham se
saaya ho jab urdu ke janāze pe 'valī' kā
hoñ 'mīr-taqī' saath to hamrāh huuñ 'saudā'
bad-zauq hai ahbāb se go zauq haiñ ranjūr
urdu-e-muallā ke na mātam se raheñ duur
hai marsiyāñ-ḳhvāñ qaum haiñ urdu ke bahut kam
kah do ki 'anīs' is kā likheñ marsiya-e-ġham
is laash ko chupke se koī dafan na kar de
pahle koī 'sirsayyad'-e-a.azam ko ḳhabar de
urdu ke janāze kī ye saj-dhaj ho nirālī
saf-basta hoñ marhūma ke sab vāris-o-vālī