batā.ūñ kyā tujhe ai ham-nashīñ kis se mohabbat hai
maiñ jis duniyā meñ rahtā huuñ vo is duniyā kī aurat hai
vo mere āsmāñ par aḳhtar-e-sub.h-e-qayāmat hai
surayyā-baḳht hai zohra-jabīñ hai māh-e-tal.at hai
vo ik mizrāb hai aur chheḌ saktī hai rag-e-jāñ ko
vo chiñgārī hai lekin phūñk saktī hai gulistāñ ko
zabāñ par haiñ abhī ismat o taqdīs ke naġhme
vo baḌh jaatī hai is duniyā se aksar is qadar aage
jabīñ par sāya-gustar partav-e-qindīl-e-rahbānī
azār-e-narm-o-nāzuk par shafaq kī rañg-afshānī
adā.eñ le ke aa.ī hai vo fitrat ke ḳhazānoñ se
jagā saktī hai mahfil ko nazar ke tāzyānoñ se
vo merī jur.atoñ par be-niyāzī kī sazā denā
havas kī zulmatoñ par naaz kī bijlī girā denā
vafā ḳhud kī hai aur merī vafā ko āzmāyā hai
mujhe chāhā hai mujh ko apnī āñkhoñ par biThāyā hai
mire chehre pe jab bhī fikr ke āsār paa.e haiñ
mujhe taskīn dī hai mere andeshe miTā.e haiñ
lab-e-lālīñ pe lākhā hai na ruḳhsāroñ pe ġhāza hai
jabīñ-e-nūr-afshāñ par na jhūmar hai na Tiikā hai
koī mere sivā us kā nishāñ pā hī nahīñ saktā
koī us bārgāh-e-nāz tak jā hī nahīñ saktā