mere kamre ke baḌe taaq meñ ik ā.īna
sūrateñ sab ko dikhāne ke liye rakkhā hai
kabhī panjoñ se kabhī choñch se hamle kar ke
ye samajhtā hai use jiit yaqīnī hogī
jab koī kaam na hogā use laḌne ke sivā
saañs bhī le na sakegā kabhī be-ḳhauf-o-hirās
sochtā huuñ ki mire mulk ke lākhoñ bachche
roz aapas meñ isī tarah laḌā karte haiñ
yahī aadat jo banā lī to vo din bhī hai qarīb
chain se rah na sakeñge ye laḌā.ī ke baġhair
be-sabab laḌne ke jazbe ko jo rokā na gayā
log aaqil hoñ ki nādān laḌe jā.eñge
vo muḳhālif na sahī apnā koī aks sahī
mil hī jā.egā unheñ koī jhagaḌne ke liye
sab rahe jā.eñge aapas meñ agar mil-jul kar
har jagah mulk meñ gulzār nazar ā.eñge