tamtamā.e hue aariz pe ye ashkoñ kī qatār
mujh se is darja ḳhafā aap se itnī bezār
mujh ko ik lamha kabhī chain bhī aayā tujh bin
ishq hī ek haqīqat to nahīñ hai lekin
soch duniyā se alag bhaag ke jā.eñge kahāñ
apnī jannat bhī basā.eñ to basā.eñge kahāñ
phir zamāne se nigāhoñ kā churānā kaisā
ishq kī zid meñ farā.ez ko bhulānā kaisā
tīr-e-iflās se kitnoñ ke kaleje haiñ figār
kitne sīnoñ meñ hai ghuTtī huī aahoñ kā ġhubār
ik nazar bhuul ke us samt bhī dekhā hotā
kuchh mohabbat ke sivā aur bhī sochā hotā
rañj-e-ġhurbat ke sivā jabr ke pahlū bhī to haiñ
jo Tapakte nahīñ āñkhoñ se vo aañsū bhī to haiñ
ḳhaak aur ḳhuun meñ ġhaltāñ haiñ nazāre kitne
qalb-e-insāñ meñ dahakte haiñ sharāre kitne
arsa-e-dahr pe sarmāya o mehnat kī ye jañg
amn o tahzīb ke ruḳhsār se uḌtā huā rañg
qalb-e-ādam ke ye riste hue kohna nāsūr
apne ehsās se hai fitrat-e-insāñ majbūr
aap ko band ġhulāmī se chhuḌānā hai hameñ
ḳhud mohabbat ko bhī āzād banānā hai hameñ
tū bhī aa vaqt ke siine meñ sharārā ban jā
tū bhī ab arsh-e-baġhāvat kā sitārā ban jā