tum mirī zindagī meñ aa.ī ho
merā ik paañv jab rikāb meñ hai
maiñ sochtā thā ki tum aaogī tumheñ pā kar
maiñ is jahān ke dukh-dard bhuul jā.ūñgā
tum ek bel kī mānind baḌhtī jāogī
na chhū sakeñgī havādis kī āñdhiyāñ tum ko
magar maiñ aaj bahut duur jaane vaalā huuñ
bas aur chand nafas ko tumhāre paas huuñ maiñ
vo vaqt kabhī to aa.egā jab dil ke chaman lahrā.eñge
mar jā.ūñ to kyā marne se mire ye ḳhvāb nahīñ mar jā.eñge
jiine kī har tarah se tamannā hasīn hai
har shar ke bāvajūd ye duniyā hasīn hai
chaman se chand hī kāñTe maiñ chun sakā lekin
baḌī hai baat jo tum rañg-e-gul nikhār sako
safar hayāt kā āsān ho hī jaatā hai
agar ho dil ko sahārā kisī kī chāhat kā
tumheñ kal apne sharīk-e-safar ko chunñā hai
vo jis se tum ko mohabbat mile rifāqat bhī
kabhī ye gul bhī nazar ko fareb dete haiñ
har ek phuul meñ tam.īz-e-rañg-o-bū rakhnā
tum ek aise gharāne kī laaj ho jis ne
har ek daur ko tahzīb o āgahī dī hai
ġham-e-hayāt se laḌte guzār dī maiñ ne
magar ye ġham hai tumheñ kuchh ḳhushī na de paayā
ye merī nazm mirā pyaar hai tumhāre liye
ye sher tum ko mirī ruuh kā patā deñge
ab mire paas aur vaqt nahīñ
saañs har lahza iztirāb meñ hai
jism-o-jāñ kā ye aarzī rishta
kitnā miltā huā hubāb meñ hai
aao āñkhoñ meñ Daal do āñkheñ
ruuh ab naza.a ke azaab meñ hai
raushnī der se āñkhoñ kī bujhī jaatī hai
Thiik se kuchh bhī dikhā.ī nahīñ detā mujh ko
sirf sannāTe kī āvāz chalī aatī hai
aur to kuchh bhī sunā.ī nahīñ detā mujh ko
aao us chāñd se māthe ko zarā chuum to luuñ
phir na hogā tumheñ ye pyaar nasīb aa jaao