ek din 'ġhālib' ke paḌh kar sher mary ahliya
mujh se bolī aap to kahte the in ko auliyā
āshiq-e-bint-e-enab ko aap kahte haiñ valī
fāqa-mastī meñ bhī har dam kar rahā hai mai-kashī
pūjne se mah-jabīnoñ ke ye baaz aatā nahīñ
aur phir kāfir kahe jaane se sharmātā nahiñ
koī bhī mahvash akele meñ agar aa jaa.e haath
chheḌḳhvānī kar diyā kartā thā aksar us ke saath
bad-gumānī kā agar mahbūb kī hotā na Dar
us ke pairoñ kā vo bosa letā rahtā raat bhar
koī rakhtā thā agar us se zarā sharm-o-hijāb
ro.ab dikhlāne ko us se kah diyā karte janāb
''ham se khul jaao ba-vaqt-e-mah-parastī ek din''
''varna ham chheḌeñge rakh kar uzr-e-mastī ek din''
gar kisī mehmān ke aane kī hotī thī ḳhabar
boriyā tak bhī nahīñ hotā thā us nañge ke ghar
is liye chhā.ī hui thī us ke ghar meñ muflisī
kal ke Dar se aaj piine meñ na kartā thā kamī
mai-kashī ko gar koī saaqī nahīñ detā thā jaam
ok se pī kar hī vo apnā chalā letā thā kaam
marte marte bhī sharāb us kī na ho paa.ī thī kam
jaam ko taktā rahā jab tak rahā ā.ankhoñ meñ dam
us ke is kirdār par mujh se na karnā guftugū
ḳhaak meñ jis ne milā dī ḳhāndānī aabrū
is qadar pahuñche hue shā.er kā ye kirdār hai
sher kahnā chhoḌ diije shā.erī be-kār hai
is se pahle ki mirā barbād ho jaa.e ye ghar
aap bas ghar meñ raheñ sher-o-adab ko chhoḌ kar
mai-kashī aur aap hoñ matlūb-o-tālib kī tarah
sochtī huuñ aap ho jaa.eñ na 'ġhālib' kī tarah