bas itnī rūdād hai merī
ishq meñ ḳhāna-ḳharāb huā maiñ
zulmat-e-shām-e-alam kam karne
apne hī ghar meñ aag lagā dī
dard-e-vafā ko shohrat de dī
mahfil mahfil ġhazal sunā kar
des des phailā.ī kahānī
apnī vafā kī un kī jafā kī
dil ke lahū se kitne aañsū
chamkā chamkā kar chhalkā.e
kabhī to ḳhud royā mahfil meñ
kabhī unheñ ḳhalvat meñ rulāyā
un se jo ġham milā us ġham ko
ik sauġhāt-e-vafā Thahrāyā
un kī qāmat kā afsāna
daar talak maiñ ne pahuñchāyā
har ik sar ko un kā saudā
har ik shauq ko vahshat de dī
bas itnī rūdād hai merī
ishq meñ ḳhāna-ḳharāb huā maiñ
kisī shahr meñ kisī hajar meñ
farsh-e-zamīñ par arsh-e-barīñ par
kaash koī vo hastī hotī
jis ko ye rūdād sunātā
us se kaash ye kah saktā maiñ
ālam-e-kul tujh se kyā pardā
maiñ ne ḳhud hī tarāshā ye but
aur us but ko ḳhudā.ī de dī
ā.ina-ḳhānoñ meñ rañgoñ ke
apnī hī sūrat ko sarāhā
dil ke mahram ruuh ke shāhid!
jhuuT aur sach pahchānñe vaale
mere ḳhair-o-shar ke muhāsib
tujh par to sab kuchh raushan hai
apnī tamannā kā mulzim huuñ!
maiñ in ḳhvāboñ kā mujrim huuñ!