justujū rahrav-e-ulfat kī jo kāmil ho jaa.e
shauq-e-manzil hī charāġh-e-rah-e-manzil ho jaa.e
haa.e ye josh-e-tamannā ye nigūñ-sārī-e-ishq
vo jo aise meñ chale aa.eñ to mushkil ho jaa.e
justujū shart hai manzil nahīñ mashrūt-e-talab
gum ho is tarah ki gard-e-rah-e-manzil ho jaa.e
vasl kā ḳhvāb kujā lazzat-e-dīdār kujā
hai ġhanīmat jo tirā dard bhī hāsil ho jaa.e
zabt bhī sabr bhī imkān meñ sab kuchh hai magar
pahle kambaḳht mirā dil to mirā dil ho jaa.e
aah us āshiq-e-nāshād kā jiinā ai dost
jis ko marnā bhī tire ishq meñ mushkil ho jaa.e
kāmrāñ hai vo mohabbat jo bane rūh-e-gudāz
dard-e-dil had se guzar jaa.e to ḳhud dil ho jaa.e
mahfil-e-dost meñ chaltā to huuñ ai dīda-e-shauq
ishq kā raaz na afsana-e-mahfil ho jaa.e
qābil-e-rashk bane zindagī-e-ishq us kī
jis kī tū zindagī-e-ishq kā hāsil ho jaa.e
apne 'ehsān' ko tū hī koī tadbīr batā
jis se ye nañg-e-mohabbat tire qābil ho jaa.e