umr-e-rafta kī kahānī kyā hai

ek tohmat hai javānī kyā hai

mere ashkoñ kī ravānī dekhī

tere ḳhanjar kī ravānī kyā hai

tere mahbūb tabassum kā javāb

merī āshufta-bayānī kyā hai

raat rote hue guzregī zarūr

varna ye dil pe girānī kyā hai

dushman-e-zīst pe jaañ detā huuñ

aur jiine kī nishānī kyā hai

haath meñ teġh hai bal chitvan par

aaj ye aap ne Thānī kyā hai

ahd-e-pīrī meñ rulātī hai lahū

haa.e kambaḳht javānī kyā hai

ek mauhūm sā tūfān-e-ḳhudī

kuchh nahīñ josh-e-javānī kyā hai