yuuñ na mil mujh se ḳhafā ho jaise

saath chal mauj-e-sabā ho jaise

log yuuñ dekh ke hañs dete haiñ

tū mujhe bhuul gayā ho jaise

ishq ko shirk kī had tak na baḌhā

yuuñ na mil ham se ḳhudā ho jaise

maut bhī aa.ī to is naaz ke saath

mujh pe ehsān kiyā ho jaise

aise anjān bane baiThe ho

tum ko kuchh bhī na patā ho jaise

hichkiyāñ raat ko aatī hī rahīñ

tū ne phir yaad kiyā ho jaise

zindagī biit rahī hai 'dānish'

ek be-jurm sazā ho jaise