zindagī thī ye tamāshā to nahīñ thā pahle

aadmī itnā bhī tanhā to nahīñ thā pahle

har taraf sham-e-mohabbat ke ujāle the yahāñ

sūrateñ thiiñ ye añdherā to nahīñ thā pahle

daav par jazba-e-ulfat ko lagā dete the log

phir bhī dil itnā shikasta to nahīñ thā pahle

dekh lete the isī ruuh ke andar ḳhud ko

ā.īna ham pe adhūrā to nahīñ thā pahle

kabhī jal jaate the rāhoñ meñ lahū ke bhī charāġh

raushnī par koī pahrā to nahīñ thā pahle