dasht-e-ġham se guzar rahā huuñ maiñ
tīrgī meñ nikhar rahā huuñ maiñ
vaqt ne qadr kī nahīñ varna
vaqt kā ham-safar rahā huuñ maiñ
bikhrā bikhrā huuñ ek muddat se
rafta rafta sañvar rahā huuñ maiñ
ḳhud-numā.ī kī har bulandī se
ziina ziina utar rahā huuñ maiñ
shukr terā ki ai junūñ-e-safar
ḳhud se bhī be-ḳhabar rahā huuñ maiñ
naam merā 'kamāl' hai lekin
umr bhar be-asar rahā huuñ maiñ