lab se dil kā dil se lab kā rābta koī nahīñ
hasrateñ hī hasrateñ haiñ mudda.ā koī nahīñ
harf-e-ġham-e-nā-paid hai āñkhoñ meñ nam nāpaid hai
dard kā sail-e-ravāñ hai rāstā koī nahīñ
apne man kā aks hai apnī sadā kī bāzgasht
dost dushman āshnā nā-āshnā koī nahīñ
sab ke sab apne garebānoñ meñ haiñ Duube hue
gul se gul tak rishta-e-mauj-e-sabā koī nahīñ
hāl-e-zār aisā ki dekhe se taras aane lage
sañg-dil itne ki hoñToñ par duā koī nahīñ
kyā koī rākib nahīñ ham meñ samand-e-vaqt kā
naqsh-e-pā sab haiñ to kyā zanjīr-e-pā koī nahīñ
maiñ to ā.īna huuñ sab kī shakl kā ā.īna-dār
bazm meñ lekin mujhe pahchāntā koī nahīñ
dil ke Duube se miTī dast-e-shanāvar kī sakat
mauj kī tuġhyāniyoñ se Dūbtā koī nahīñ
aañkh mīchoge to kānoñ se guzar aa.egā husn
sail ko dīvār-o-dar se vāsta koī nahīñ
arsh kī chāhat ho yā pātāl kā shauq-e-safar
ibtidā kī der hai phir intihā koī nahīñ
kārvāñ 'ḳhurshīd' jaane kis guphā meñ kho gayā
raushnī kaisī ki sahrā meñ sadā koī nahīñ