tumhāre jaane kā ham ko malāl thoḌī hai
udāsiyoñ meñ tumhārā ḳhayāl thoḌī hai
manā.ūñ kis tarah holī maiñ dostoñ ke saath
haiñ sab ke haath meñ ḳhanjar gulāl thoḌī hai
mujhe ye ġham hai vo ab saath hai raqīboñ ke
ye aañkh us ke bichhaḌne se laal thoḌī hai
savāl ye hai havā aa.ī kis ishāre par
charāġh kis ke bujhe ye savāl thoḌī hai
karam hai us kā agar vo navāztā hai hameñ
hamāre sajdoñ kā is meñ kamāl thoḌī hai