ye kis se aaj barham ho ga.ī hai
ki zulf-e-yār pur-ḳham ho ga.ī hai
Tapak paḌte haiñ vaqt-e-sub.h aañsū
ye aadat misl-e-shabnam ho ga.ī hai
ba-zāhir garm hai bāzār-e-ulfat
magar jins-e-vafā kam ho ga.ī hai
zahe tāsīr-e-kū-e-ḳhāk-e-jānāñ
mire zaḳhmoñ pe marham ho ga.ī hai
bas ai dast-e-ajal kuchh rahm bhī kar
ki duniyā bazm-e-mātam ho ga.ī hai
nahīñ ḳhauf-e-shab-e-hijrāñ mujhe ab
mirī ġham-ḳhvār o hamdam ho ga.ī hai
yahī hālat hai ik muddat se 'mahrūm'
tabī.at ḳhūgar-e-ġham ho ga.ī hai