dhuup jab Dhal ga.ī to saaya nahīñ
ye ta.alluq to koī rishta nahīñ
log kis kis tarah se zinda haiñ
hameñ marne kā bhī salīqa nahīñ
sochiye to hazār pahlū haiñ
dekhiye baat itnī saada nahīñ
ḳhvāb bhī is taraf nahīñ aate
is makāñ meñ koī darīcha nahīñ
chalo mar kar kahīñ Thikāne lageñ
ham ki jin kā koī Thikānā nahīñ
manzileñ bhī nahīñ muqaddar meñ
aur palaTnā hameñ gavārā nahīñ
dūsroñ se bhī rabt-zabt rakheñ
zindagī hai koī jazīra nahīñ
kab bhaTak jaa.e 'āftāb' husain
aadmī kā koī bharosa nahīñ