ā.īna jism se hai mulāqāt ke liye

betāb sī hai ruuh tirī zaat ke liye

milnā thā rab se kar ke badan ko misāl-e-ḳhāk

is ko sañvāre jaate the kis baat ke liye

pursān-e-hāl hashr meñ koī nahīñ hai aaj

bechain sab haiñ terī ināyāt ke liye

gar kuchh nahīñ to ashk-e-nadāmat hī hote saath

nazrāna kuchh to hotā tirī zaat ke liye

'nīlam' amal ke jalte charāġhoñ ko rakhnā saath

kuchh raushnī to chāhiye is raat ke liye