koī rafīq baham hī na ho to kyā kiije

kabhī kabhī tirā ġham hī na ho to kyā kiije

hamārī raah judā hai ki aisī rāhoñ par

rivāj-e-naqsh-e-qadam hī na ho to kyā kiije

hameñ bhī bāda-gusārī se aar thī lekin

sharāb zarf se kam hī na ho to kyā kiije

tabāh hone kā armāñ sahī mohabbat meñ

kisī ko ḳhū-e-sitam hī na ho to kyā kiije

hamāre sher meñ roTī kā zikr bhī hogā

kisī kisī ke shikam hī na ho to kyā kiije