vo tark-e-ishq kā thā rāsta chalā gayā maiñ

bilā-irāda hī jis par chalā chalā gayā maiñ

vo shaḳhs yūñhī kahīñ rāste meñ mil gayā thā

palak jhapak ke use dekhtā chalā gayā maiñ

mirī hayāt meñ ik dūsrī mohabbat thī

use bhī aur koī mil gayā chalā gayā maiñ

ḳhabar nahīñ ki yahāñ aur kaun hai maujūd

pata karo ki yahīñ par huuñ yā chalā gayā maiñ

phir us ke ba.ad kahāñ thā mujhe nahīñ ma.alūm

faqīr-e-ishq se le kar duā chalā gayā maiñ