sitam-dost fikr-e-adāvat kahāñ tak
kahāñ tak vafā se baġhāvat kahāñ tak
ḳhilāf-e-sulūk-e-mohabbat ke ḳhūgar
ḳhilāf-e-sulūk-e-mohabbat kahāñ tak
musalsal sitam kī hukūmat ke baanī
musalsal sitam kī hukūmat kahāñ tak
uTho dard kī justujū kar ke dekheñ
talāsh-e-sukūn-e-tabī.at kahāñ tak
kabhī hukm-e-pīr-e-muġhāñ bhī bajā lā
faqat ittibā-e-sharī.at kahāñ tak
kabhī kuchh natīja nikālo to jāneñ
faqat ḳhabt-e-mālūm-o-illat kahāñ tak