shikāyat ab nahīñ mujh ko kisī se

magar āñkhoñ kā rishta hai namī se

muhāfiz ab charāġhoñ kā vahī hai

jo vāqif hī nahīñ kuchh raushnī se

gañvā duuñ kaise maiñ is tarah yūñhī

tujhe paayā hai maiñ ne bandagī se

nigāhoñ se pilā detā hai jab vo

sambhaltā maiñ nahīñ huuñ phir kisī se

yahīñ par ḳhatm hotī hai kahānī

judā ab ho rahā huuñ zindagī se

vahī 'jāved' thā matlūb us ko

farishta ban gayā jo aadmī se