shahr kī rasm hai purānī vahī
sāzisheñ taaza haiñ kahānī vahī
dard ke mausamoñ se kyā ummīd
sab balā.eñ haiñ āsmānī vahī
phir se khīñcho hifāzatoñ ke hisār
phir hai dariyāoñ kī ravānī vahī
ham faqīroñ ke hausle dekho
zaḳhm jitne hoñ sargirānī vahī
saare āsār haiñ judā.ī ke
surma.ī shaam hai suhānī vahī
ḳhaar bo.e to zaḳhm pāleñge
vaqt dohrā.egā kahānī vahī
yuuñ to sadiyāñ guzar ga.iiñ 'qaisar'
dil ke sadme tirī javānī vahī