apne ahbāb ko ash.ār sunāne niklā
maiñ bhī kin logoñ meñ sar apnā khapāne niklā
ba.ad-e-koshish bhī na dīdār kī sūrat niklī
chāñd badlī se kisī aur bahāne niklā
is ko ta.alīm o mohabbat kī zarūrat hai abhī
kam-sinī meñ ye jo be-chāra kamāne niklā
chāñd ko dekh ke taara bhī badal kar poshāk
bazm-e-ahbāb meñ rañg apnā jamāne niklā
merī shohrat kā diyā shams na ban jaa.e kahīñ
koī is vāste tauqīr ghaTāne niklā