dayār-e-ḳhvāb meñ koshish hai phir sajāne kī
banā rahā huuñ maiñ tasvīr āshiyāne kī
abhī to sirf bagūle uThe ḳhayāloñ meñ
abhī se rukne lagī nabz kyuuñ zamāne kī
shuā.eñ dene lage aisā ke añdhere bhī
na.ī adā hai charāġhoñ meñ jhilmilāne kī
mahāz maiñ ne hī apne ḳhilāf kholā hai
ki aa ga.ī hai ghaḌī ḳhud ko āzmāne kī
zarā sī Thes se aañsū nikal paḌe varna
ye koī rasm nahīñ hai diye jalāne kī