kuchh bhī ho vo ab dil se judā ho nahīñ sakte
ham mujrim-e-tauhīn-e-vafā ho nahīñ sakte
ai mauj-e-havādis tujhe mālūm nahīñ kyā
ham ahl-e-mohabbat haiñ fanā ho nahīñ sakte
itnā to batā jaao ḳhafā hone se pahle
vo kyā kareñ jo tum se ḳhafā ho nahīñ sakte
ik aap kā dar hai mirī duniyā-e-aqīdat
ye sajde kahīñ aur adā ho nahīñ sakte
ahbāb pe dīvāne 'asad' kaisā bharosa
ye zahr bhare ghūñT ravā ho nahīñ sakte