tujh bin rah-e-hayāt meñ lutf-e-safar kahāñ
taskīn-e-qalb-o-rūh sukūn-e-jigar kahāñ
tūfān-e-barq-o-bād meñ ye jaa.eñ par kahāñ
ujḌe hue chaman ke parindoñ kā ghar kahāñ
us kī nigāh-e-nāz ne be-ḳhud banā diyā
ḳhud mujh ko apne-āp kī ab hai ḳhabar kahāñ
jaañ se azīz-tar hai unheñ gulsitāñ kī ḳhaak
jaa.eñ chaman ko ahl-e-chaman chhoḌ kar kahāñ
bas ḳhūbī-e-nasīb ne tujh se milā diyā
varna kahāñ pe tū hai tirī rahguzar kahāñ