us but ko dil dikhā ke kaleja dikhā diyā
asbāb apnī zaat kā saarā dikhā diyā
ham ne tumhārī baat pe dikhlā ke aa.ina
ma.ashūq ḳhūb-rū tumheñ tum sā dikhā diyā
mushtāq-e-dil huā jo vo mai-nosh bazm meñ
maiñ ne uThā ke haath meñ shīsha dikhā diyā
ham ne bhī un ko un kī tarah chheḌ-chhāḌ meñ
ronā dikhā diyā kabhī hañsnā dikhā diyā
o bahr-e-husn girya-e-behad ke lutf se
sau baar mujh ko ashk kā dariyā dikhā diyā
ham ne 'shagufta' us but-e-kāfir ko pyaar meñ
apnā samajh ke maal parāyā dikhā diyā