ho tirā ishq mirī zaat kā mehvar jaise
usī ehsās kī maiñ ho ga.ī ḳhūgar jaise
ek vīrānī tire lahje se aa.ī mujh tak
phir vahī mere utar aa.ī ho andar jaise
koī bhī kaam mere haq meñ nahīñ ho paatā
ruuTh kar baiTh gayā ho ye muqaddar jaise
vo koī vaqt thā jab dil thā baḌā nāzuk sā
ab to siine meñ rakhā hai koī patthar jaise
ho tirā haal mere ishq meñ vaisā 'zehrā'
hai mirā haal tire hijr meñ abtar jaise