baġhair naqshe ke saare makān lagte haiñ
ye jitne ghar haiñ qazā kī dukān lagte haiñ
kabhī to sach kabhī bilkul gumān lagte haiñ
nafīs log haiñ jādū-bayān lagte haiñ
ye Thekedār imārat ke ye zamīñ vaale
gire jo ghar to bahut be-zabān lagte haiñ
maiñ un meñ aaj bhī bachpan talāsh kartā huuñ
maiñ ḳhush nahīñ huuñ jo bachche javān lagte haiñ
vo merā bhaa.ī nahīñ par vo koī vaar sahe
mirī bhī piiTh par niile nishān lagte haiñ
qarīb aa.eñ to chhoTā sā qad nikālte haiñ
ye log duur se kitne mahān lagte haiñ