diyā jalā ke koī chāñd par rakhā hogā
usī ke saa.e meñ vo ham ko DhūñDhtā hogā
koī to zid meñ ye aa kar kabhī kahe ham se
ye baat yuuñ nahīñ aise thī yuuñ huā hogā
tumhārā ghar sar-e-mahtāb jo banā Daale
tumhārā beTā nahīñ vo ḳhudā rahā hogā
vo āñkheñ abr kī mānind ro rahī hoñgī
vo ziina ḳhvāb meñ mahtāb par Tikā hogā
ye kyā zarūrī hai ā.ankhoñ meñ der tak rahnā
ḳhayāl aap hī tasvīr ban gayā hogā
sunahre pinjre kī apnī hī haisiyat hogī
parinda ḳhush hai magar ḳhuub chīḳhtā hogā
kahā hai ek nujūmī ne tum miloge hameñ
zamīñ se chāñd talak ek rāsta hogā
ḳhudā kare ki bahut jald tum ko dekh aa.eñ
tumhāre ghar meñ ab ik phuul khil uThā hogā