kaisī hai ajab raat ye kaisā hai ajab shor

sahrā hī nahīñ ghar bhī machātā hai ajab shor

ik dard kī āñdhī mujhe rakhtī hai hirāsāñ

ik aas kā jhoñkā bhī uḌātā hai ajab shor

raushan hai kisī aañkh meñ tārīkī-e-ahvāl

ik tāq-e-tamannā meñ dahaktā hai ajab shor

ik shaḳhs mire ā.ina-e-dil ke muqābil

ḳhāmosh hai lekin pas-e-chehra hai ajab shor

aatī hai bahut duur se pāzeb kī āvāz

phir merī samā.at meñ chahaktā hai ajab shor

maiñ zabt ko har ruḳh se sipar kartā huuñ lekin

āñkhoñ se mirī jhāñktā rahtā hai ajab shor

shāyad tirā hissa hai kināre kī ḳhamoshī

ma.alūm tujhe kyā tah-e-dariyā hai ajab shor