mohabbat ek jaisī hai vafā.eñ ek jaisī haiñ
yahāñ mausam badalne par havā.eñ ek jaisī haiñ
ajab shahr-e-suḳhan ābād hai merī samā.at meñ
ajab shahr-e-ḳhamoshāñ hai sadā.eñ ek jaisī haiñ
tirī āñkhoñ meñ āvāzeñ mire hoñToñ pe sannāTā
safar kī dāstāneñ kyā sunā.eñ ek jaisī haiñ
sunā hai us taraf bhī shaam ko lahja mahaktā hai
ḳhafā aapas meñ haiñ lekin duā.eñ ek jaisī haiñ
'razī' donoñ ko akasr ḳhauf-e-tanhā.ī satātā hai
'razī' donoñ kī qismat meñ sazā.eñ ek jaisī haiñ