sukūt-e-shab sitāroñ se havā jab baat kartī hai
tumhārī yaad kī ḳhushbū mire har sū bikhartī hai
vo ik laḌkā jo merī zaat kā mehvar hai muddat se
mire andar kī laḌkī bhī usī ke saath rahtī hai
kabhī dil meñ mohabbat ke hasīñ mausam nikharte haiñ
kabhī mujh se lipaT kar zindagī bhī raqs kartī hai
tire ḳhvāb aur ḳhayāloñ kī agar mahfil sajī ho to
kabhī gaa.e tire naġhme kabhī bantī sañvartī hai
mujhe merī mohabbat par bahut hī maan hai 'vishma'
usī ke naam se ab zindagī kī saañs chaltī hai