vo sitam-gar hai ḳhayālāt samajhne vaalā
mujh se pahle mire jazbāt samajhne vaalā
maiñ ne rakkhā hai hamesha hī tabassum lab par
ro diyā kyuuñ mire hālāt samajhne vaalā
jo na samjhe terī manzil vo yūñhī chaltā rahā
ruk gayā tere maqāmāt samajhne vaalā
jo na samjhe vo banāte rahe lākhoñ bāteñ
huā ḳhāmosh tirī baat samajhne vaalā
rāz-e-taqdīr pe kyā raushnī Dālegā koī
ḳhud savālī hai savālāt samajhne vaalā