ijz-e-ahl-e-sitam kī baat karo
ishq ke dam-qadam kī baat karo
bazm-e-ahl-e-tarab ko sharmāo
bazm-e-as.hāb-e-ġham kī baat karo
bazm-e-sarvat ke ḳhush-nashīnoñ se
azmat-e-chashm-e-nam kī baat karo
hai vahī baat yuuñ bhī aur yuuñ bhī
tum sitam yā karam kī baat karo
ḳhair haiñ ahl-e-dair jaise haiñ
aap ahl-e-haram kī baat karo
hijr kī shab to kaT hī jā.egī
roz-e-vasl-e-sanam kī baat karo
jaan jā.eñge jānñe vaale
'faiz' farhād o jam kī baat karo