kuchh mohtasiboñ kī ḳhalvat meñ kuchh vaa.iz ke ghar jaatī hai
ham bāda-kashoñ ke hisse kī ab jaam meñ kam-tar jaatī hai
yuuñ arz-o-talab se kam ai dil patthar dil paanī hote haiñ
tum laakh razā kī ḳhū Daalo kab ḳhū-e-sitamgar jaatī hai
bedād-garoñ kī bastī hai yaañ daad kahāñ ḳhairāt kahāñ
sar phoḌtī phirtī hai nādāñ fariyād jo dar dar jaatī hai
haañ jaañ ke ziyāñ kī ham ko bhī tashvīsh hai lekin kyā kiije
har rah jo udhar ko jaatī hai maqtal se guzar kar jaatī hai
ab kūcha-e-dil-bar kā rah-rau rahzan bhī bane to baat bane
pahre se adū Talte hī nahīñ aur raat barābar jaatī hai
ham ahl-e-qafas tanhā bhī nahīñ har roz nasīm-e-sub.h-e-vatan
yādoñ se mo.attar aatī hai ashkoñ se munavvar jaatī hai