sitam sikhlā.egā rasm-e-vafā aise nahīñ hotā
sanam dikhlā.eñge rāh-e-ḳhudā aise nahīñ hotā
gino sab hasrateñ jo ḳhuuñ huī haiñ tan ke maqtal meñ
mire qātil hisāb-e-ḳhūñ-bahā aise nahīñ hotā
jahān-e-dil meñ kaam aatī haiñ tadbīreñ na ta.azīreñ
yahāñ paimān-e-taslīm-o-razā aise nahīñ hotā
har ik shab har ghaḌī guzre qayāmat yuuñ to hotā hai
magar har sub.h ho roz-e-jazā aise nahīñ hotā
ravāñ hai nabz-e-daurāñ gardishoñ meñ āsmāñ saare
jo tum kahte ho sab kuchh ho chukā aise nahīñ hotā