donoñ jahān terī mohabbat meñ haar ke
vo jā rahā hai koī shab-e-ġham guzār ke
vīrāñ hai mai-kada ḳhum-o-sāġhar udaas haiñ
tum kyā ga.e ki ruuTh ga.e din bahār ke
ik fursat-e-gunāh milī vo bhī chaar din
dekhe haiñ ham ne hausle parvardigār ke
duniyā ne terī yaad se begāna kar diyā
tujh se bhī dil-fareb haiñ ġham rozgār ke
bhūle se muskurā to diye the vo aaj 'faiz'
mat pūchh valvale dil-e-nā-kardā-kār ke